Bio' Songai

Ngajan ii beng ojan ne ke; daley Sarawak. Ojan cen mempam abe' tai taup. Boka nta ojan utung tau, ojan mempam atau ojan tai taup. Ji ne pengalai teka' le ujung oman. Boka le ke' lepo' te, songai bio' ne ke' Long Dungan. Nta tisen naki, oban majan ne' nat mutu denga ke' de' ngeline' ke' Long Dungan. Tidai re,..nta pe songai bio' dau re. Mungkin ku'un mpeng Bakun, basa' nta ne songai ke bio' ale' uko' ba'an sik bekading re.
Jadi dau le milu mung, boka le tai ule' ke' oma' te,..tai ne keno keno ke. Lnya janan naki. Boka tai ke' apau,..na'at tiga le titai ngan jambatan...ma'an ale' sik janan kereta tepat tai ke' Data Kakus. Harap janan un tiga oman ji. Keno keno ke ngkin kereta, boka em tereba kereta. Ayen bosek ke abe',,ti pe sekempiu sada mata....malap kereta le pebey cun janan. Meka pe ilu de' ke' alo' ne,..tiga tiga lote teka' ngalut...ayen pe beng kelo' ke napa ngan nepet du ne....tiga pekeliko le ketai le ngan du....

Nekalu alo'

Wet Season?????ja dau ca mutu kake' nyinan ketai-e' masat masat ke' pasen. Ya...its wet season. Weather man said it will be wet day for few days in Kuching. I asked my friend in Bintulu, they said its rain almost everyday. Have to buy an umbrella." Lepa ja te' masat la'a na'at sik alo' juan galen/inu. Un jualan murah na'ki daure. Jualan sempena Krismas. Midan e' na'at sik harga, ida ngempau ne oban harga, lepa ja bada' 70% discaunt...nai ole' ke' harga je' ading re...ngan un pede' morah keri'ut. Ja ne sik alo' di ngemampo pena'at man JUALAN DISKAUN!!! Jadi na'at tiga le si' harga gelam de' ilu meli. Alo' nekalu ilu ne ja.
"Nekalu alo'" dau ca kata' de' lata' sena a' re. Ji jane keadaan ilu pesilau je' juan inu ngan un palai milu nyelem ala' inu je' ya juan. Mencam ale' me' pat nekalu alo' ore...dau re ...tina dau re bada' ja ne. Midan le ngimet ja naki,..ca perbuatan nta tiga oban ja. Sio' sepin le toman ja. Senteng keti,..beng kenai pulit meka piweng ilu ne kena le ke nai pelebau pamen kedai alo' je' ilu nekalu ja.
Ake' kelo' ke bada' milu,..ayen le ten nekalu lao' mata' mata' naki. Un sistem computer je' ida nak ke' inu re,..midan le lapa pamen,..ya tit tit tit tit...nai du meka piweng ilu ne...Jadi ayen peleto' to' ke nekalu alo'. Ja ne dau siu je' ilu pekalai tau ji,..."NEKALU ALO'."

BAYAK

Bayak- Kado' ale' dau tekena' ngan mitos de' lepo' ilu Badeng nekena' ngan un kaitan ngan baya'. Baya' de' lepo' ilu tisen jane baya' pote', baya' utun, ngan kelayan baya'. Un sik gaban de' kine jane baya' de' du ngulung. Kado' ale' baya' de' ida bgulung ki. Seregip teka' le ngimet baya' oman, nyelo' ngan mengkey kelonan. Kado' sik gaban de' ida na' ke' nting, tapi, nta un ca gaban de' un kaitan ngan lepo' ilu. Baya' je' ake' man ja jane ca baya mucuk ntung. Dado' ngan timai sik pak ja. Dau re keja, buaya katak. Nta dau bayak ji oman daging. Oman tumbuhan ngan atuk tua' le bayak ji. Un gaban je' kedua ja, jane bayak kelayan je oman daging. Je' te' sada lan jane gaban bayak utun. Nta un eko bayak jin. mepot sik utun ja.

Boka le nyepole' ke' tekena', baya jane tenoyan oban dua re pade' nepecau pelawat songai. je' seken labo' ke' songai tepa nepecau pelawat songai ja. Je' sadin jadi lencau ngan je' seken noyan baya'. Ja dau tekena' le Badeng. Nta le tisen tekena' ja lan atau cuma tekena' tua' le. Ngan meka petekena de' bada' du jadi batu. Nta le oba' ke mempertikai mitos atau legenda di. Tapi un je' menarik minat e' ki, jane kaitan le ngan tekena' ji. Tadin tai lepo' ilu pokey ke' data Kakus bekading re, kado' ale' baya' du ta'an. Kado' pe de' ngeleting ke' tu'un. Pabe' bayak pote' pe un. Ading re, ake' nta tisen, sebarang tai neset mita atuk, lepa ja, ida bada' un du ta'an bayak ka. Jadi nta teka' le makang ke neset. Malap baya' metak ilu. Un pe de' tego' bayak tekoleng ke' pokat re. Un pe palai de' bada' ida mesau tejalak re pentang ke' bayak. Macam macam cerita ilu ngening. Un di lan ta'in. Nta pe' tisen. Mutu ke' de' lata' ke' Data Kakus. ida tisen mung di.

lepa' majan ne lepo' ilu ka, puji Tuhan, nta un kes kes de' melibatkan bayak. Sedangkan ke aba' ne,..nyeng ke' long Kakus, kado' kes bayak oman lepo' du. Ke' tubau, ke' Kakus lepo' impan, un kes bayak oman ida. Jadi ake' ngio' tai ke lan pe teka' tekena' ji. Ja dau le ngio' tua' le ja. Tiga mutu ke' de' lata' pe ji. Jale tisen pengelelan tekena' ji.

Boka le na'at secara saintifik, bayak jane dalem kategori kabuk, takang, ngan yu tene ngadan cen jidai,..je' oman patai asu,..oba' oman asu lepong jidai......nta nawai ngadan cen ja. Jadi bayak senteng neset majan ngan pelemet dalem songai majan. Ngan bayak nai ngetau ke' ait sada bai ngepana osa re lepa re pelemet dalem songai.

Kine ida un juan sin bayak,..nta teka' le metek koman sin bayak ji...oban nta pe' oba' oman kabuk...ca liwai pe' ten teka' sin kabuk...

Masat ke' sada banget

Tai masat masat pade' sada banget ke' Santubong. Ji ca sada bai je' atek tiga lan, ngan tempat ji jane Psair Pandak. Bekading de, tempat ji jane ne lepo' Melayu. Kado' sik oma' Melayu ke' sada bai ji. Tapi naki, lenga ne sik naa ait ji. Nyeng mung lepo' ji pokey tai ke' penempatan mading je' du nak mida ke' Rampangi daure kidi. Jadi, boka le na'at sik tempat ji, tiga ale'. Ilu nta tisen yu toman perintah cuk ida tai pokey. Tiga sik udip re kai ading de. Un dau lepo' ka, perinta kelo' ke oyan ca tempat rekreasi dau pantai ji. Tapi naki un sik re oyan ca hotel/ resort nyeng kata pantai ji,..nta le tisen yu je' atek lan kerajaan ke oyan. Jadi dalau nai amai me' redo kaine ading re, ame' pat tai masat ke' pantai ji tai ngkin anak do toya ait. Pelempe' man anake' je' dumit, ca leto ngan anak ke' je bio' nekejeng kata Pemonan ka. mencam daure pisu 'OKO" ne. Na' pida anak pekelet ngan lepo' du. Tisen lote sik re tepun re. Nta re takut ida. un lote oban bau' le kida. Mening sik banget ji boka tiga awang. Tiga ale' nto kai. Tapi mesti nawai ayen losa, ntaun sapai ke' sada bai'''kado' jamok ki. Ida koma " Sand Fly". boka ji lepa oman ilu, penco pu'u tua' ne ata e nyemaat Oko' ba'an pinget re. tapi timai ale' jamuk di. Un sapai ngan poto ngala, boka le ngelosa, poto tai neset.

TUN UDU LO

Oman belua' tau atau tai taup nyinan le todo mabau ataupun majau dengkep ale' ngan tun udu lo ( tun sampen ) ngan telang pelo' ubut osan. Ji ca pengoman le Badeng je' sukup unik ngan nta du oman udu lo ngan le meki. Un si' pengalai lepo du atau alo' ida nyaga udu lo ( Kucai ). Un te po'o, lepo iu Badeng beng metun tua' le, ngan lia ngan osen. Je' penting ale' jane bicing mesti cukup. Boka nta un bicing, un teka' ngelala keriut teka' sampen.

Ji ca pengoman unik ngan ca pengoman kelayan le je' cukup tiga teka'. Un bekading re, jawai teka' e nawai tai nogan ngan du, ida oyan tun sampen mi'uk ke' daun ngan petolat milu mempan kena le tai nogan. Idi pilu oman kena le ke nogan. Ngan ja ida oyan tantak togan boka nta atuk siyai babui atau pun je' atek tiga teka' dalau le lau jane,..telang maggie atau un pe telang telo yap. Ja dau le ten ke petekep tun sampen ji ngan pengoman le de' ca. Un ca la'a jane tun kiyai. Tun sekayat pe cukup tiga teka'. Mung di,..ilu metun ngan liya kelai. Ja ne juko du koma Badeng nta sokat cuk cen inan liya kelai. Jadi tai lote ,ita udo lo,.. tun sekayat,.ngan maap atuk oyan tun kiyai. Ayen le lopau pengoman le Badeng. Je' atek majan teka' ake' nta oman jane,....borey bangat atau kijun???nta pe' tisen yu bana le kidi.

Liya kelai sik gaban je sada lan ja....nyelo' iba le teka' le na'at sik liya ja. Kala ucuk ku'un le badeng!!!!

Ule' Krismas o' baro?

"Selamat Krismas"!!!!!
Mung le je' atek bangen tawai teka' midan le ngimet ke ngeramey krismas. Cen tading bolan 12, kado' ale' ne dau kelamun kelamun le lepo' ilu. Kado' ne dau cerita le kenta' oma'. Kelayan sik le Badeng Long Dungan un adan ke' nta' oma'. Kane ketai le kejai ngan cerita ka'ang ilu. Kane kenai kelamun kelamun le lua' ngan un pe palai de' nta oba' ke kalah dau. Pa tekeli wat batuk le ne sik pui re cerita ka. Cerita oma, cerita tai ngasu, cerita tai mengau songan, cerita tai juan kojau, cerita tai nyenang, cerita ti bub, ngan kado' de' ca la'a. Kado' ale' ne sik kenai du ule' tuung seperet. Un te po'o, oamn ji, nta lepe osa ji senteng tai ule' koma'. Kado' teka' de' mempeeng ilu tai ule'. Beng tai ule' pa Bintulu tua' le teka' le oman ji. Tai na'at oko re ka, tiga ne ja. Bimpin teka' le oma', tapi kumin pilu kia. Kado' pempeng.
Ji sik gaban anake' Gavrilla Christabelle oman ca re. Sa-e' sey ta'an sik hadiah de' ame' na' mia dalau Krismas oman ca re. Oman ji la'a un pe hadiah nak mia la'a. Bio' keriut ne oman ji, un kira kira nyeng dua oman ney. mencam ne dau e pisu keriut. Ya dau e jata' jata' ke ti isu ngan kado pe de' tekoleng ale' dau pedaru ilu. Nta lepe leto dumit ji tai ta'an Long Dungan. Boka ke tai ke' Long Dungan, mungkin beng ke pu'u ne taket te. Kado' ale' teka' jamuk timai koma' te baka. Beng butu ne teka' taket le ku'un re. Ca liwai pe tai le ngking ida ole' Ngena nai re bio' keriut. Jagan ale' teka' leto dumit ji. Nta ji bua' ilu meseng ya le kulu. Bika' pe menging ale'. teking teka' le ku'un toyau re na' pey dumit uko' ba'an ca liya kelai re.
Boka le tai ule', jaga' tiga le anak le de' nta mencam ngan du koma' di. Nodep le na'at kengkey sik tai asat re. Apan le sentiasa ramey ngan sae'. Ti nyae' me senganak le mung de' un ke' Long Dungan.
" SELAMAT KRISMAS NGAN SELAMAT OMAN MADING ME MUNG TEPAT DE' KE' LONG DUNGAN NGAN MEKA PE DATA KAKUS".

Rancan Waterfall

Anak dua di darey ale'. Beng ilu ke pabat ne di boka le tai masat ke' pasen. Nta ne si' re tisen du ke ala' ida ne. Nak pe dumit ngan timai sik re,...un te po'o, senteng cuk ilu mpau daa' teka' anak di. Mencam dau re jawap ilu ngan ja. Boka tai nto' beng kelo' ke ngawen ke' dalem mesekum ngan nta tisen jiwen. Nak pe pejetep sik jipen de, jawai re obak sik ke pelemet lepe. Un ca liwai e ame' pat tai nto' ke' ca alo songai ke' Serian, Rancan water fall ngadan tempat ji. Anak laki ji nepecau ke ca belau i'ut le. Penco sik neset ngan nta mencam nai kempau. Ake' menat ya ngan sangkit. Lepa ja, ake' mutu kiya, su' yu ja ore? Tai e' nyatung ja ore amai, dau-e. Un meka sik tai du nyatung, dau e' kiya. Suk ke menyet peja ole to...Nta amai dau-e. Mencam ake' neset dau-e. Ten neset dau-e kiya. Ca, dua, telu,..jem sey na' ulu-e ke' dalem songai, meka lote sangkit nai-e omau. Ca saat tua' le...Ja sey neset neja bana..Tiga ale' sik Rancan waterfall. songai mening sekila le sik ngan sengim ale'. Nawai le teka-e' songai ke' Nyabet. Mening lae' sik songai kate ading re. Nta tisen naki? cak mening lepe bane'. Kelo' ke tai nyenang teka' le ke' oma' te boka le un kebi'en tai ule' Nawai tai nyenang ke' alo Serengau ke' u'ung jidai. Kado' taok ke' nta u'ung jidai. Harap songai serengau cak mening lepe. Majan ne' nta tai ke' serengau...jawai dalem belau jangkang lepe ta'in? atau libau ale' ne? Kado' ale' teneyken ka bekading de. Un ca inan dian pulut ke' aba' ka,..kata jelekey jidai,...nta-un du tai ala' bo'an ji. Ha ha ha..ja dau le ngimet tai nyenang ke' serengau...selawan sik u'ung serengau boka taga'. Boka krismas, kane ketai muda mudi di nyenang.

SELAMAT HARI NATAL 2008

Ayen pera anak!...Ayen tai ala' kelo'ong da. Tiap o...ayen oman anak. Ja dau le payen anak le dua di oban ma'an ale' teka' ke oyan kise' pohon terang ji. Dalau teka' le ke na' lampu di' beng sik ketai anak le je' dumit ji menat wayar ne...senteng keti sik ketai e ala' de' ilu mentang ngan ngeriding kidi. Tapi redo cuk ake' oyan inan terang ji oban redo kelo' ke boka' hadiah krismas redo la'o. Und au e' bada' me redo, ngena inan terang lepa ilu na' ki, ngan mung hadiah ilu na' kenta' ka. jadi baru senteng boka' hadiah de' ilu meli ji. Nta sabar ne redo keja..labo ngan sebi'e' lene sik pak redo kelo' ke ala' hadiah.

Yu teka' ramei tepat onam ji? Boka le ke' lepo' ilu Long Dungan te, midan le ke ti pentas? Ja dau le mutu ka'ang ilu. Pentas kaum Ibu, Pentas Kaum Bapa, Pentas anak sekolah minggu ngan pentas mua/mudi. Mung di ilu ngimet ngan sibuk ale'. Lepa ja..mada lasan....ngan mada padang bub. Un lote tai tepat lidik padang bub jidai? mudu ale' sik padang ji. Ja dau le ngimet krismas je' cukup selawan ngan ramei sik ilu ti ke' lepo' ilu. Bimpin teka' le kelo' ke na'at da mung la'a. Selamat krismas...dau le ngotang ji..apan le je' atek ading dau ti SELAMAT KRISMAS senganak! Tuhan memberkati ilu mung.

LIYEN OMAN UBI?

Ubi lan dau le Badeng. Tiga ale' teka' oman ubi lan. Mey ngan mapu teka' e keriut. Kado' ale' sik ubi lan du juan ke' makit naki odai. Beng ilu ne je' supe' ke mile' je' ngkey ilu oba' ke meli. Ake' paget nawai ke' songai Padai Data Kakus bekading re, Oko Pato' redo Pedangang mola ubi lan ke' sada bai sg. padai. Tiga ale' sik ubi lan redo ka' . Un ke' ca sada bai ka, mait le sik tana' ja, kala' ke pote' ke sik sin ubi lan redo lua' oban tana' tuan sada bai. Nyeng ale' ke' sg. Padai. Mungkin ilu tisen ketu redo ke' sg. padai. Ketu redo jane ke aba' jambatan sg. padai jidai ne. Un tepe naki odai, boka le tai ka, nta ne un sik udip ubi lan jidai odai, mudu lene sik sada bai ngan bio' ne sik pola bua' redo ka. Ngan meka pe de' pipa redo ka, bio' ale' ne sik pola ngan sokat nida oman boan bua' re.

Ubi lan kado' ale' je' ilu senteng oyan cin idi. Oyan kueh, nyaga pe garip, melo' lepa ja meca' - meca' jadi uko' ba'an sik mesh potato. Meka ne dau le bada' neng ubi lan ji. Kado' ale' pe ubi de' lepo' ilu oman bekading re dalau le liyen petoncen pata' loten. Beng tai ti napu ne du. Ca gaam ba

a de' ilu ngelet ngan kado' napu ubi,..jane sik pengoman le. Liyen daule ke ja. Un tepo'o, midan le na'at sik orang puti, ida oman ubi tua'. Liyen ale' oban sik di. Beng oman pelo' ubi lan ne di. Ubi lan ( Sweet Potato) kira ke kua' lo' te ja. Jadi ake' ngio' nta oban le liyen bekading re, cuma ilu ten pengoman orang puti ngeliwak. Midan le nta ngelayan teka' oman pengoman ji, ilu koma ilu liyen oban le ntaun ba'a ke oyan mak milu. Peluk ubi pengoman orang puti, ngan mak ka'a pengoman le Badeng. Ten cuk orang puti oman mak peloto, ida koma ida liyen oban nta-un potato. H eh eh eheh he :)

ALIM

Gaban jin jane sik gaban alim. Mung tepat mungkin tisen alim bane'? Kado' ale' alim ke' Long Dungan. Kado' pe alim Sekapan Panjang ngan Sekapan Piit re panak. Boka musim bua' bo'an, beng ngena'a ne alim ke' sada ba'i alo baliu. Un ca oman ne,...nta ne sik du obak ke oman laim. Bora sik alim matung ne. Un inan alim de' nyeng sada bai, penco ke' alo baliu ne ketai bo'an di labo'. Kelayan inan alim di nyeng ke sada ba'i, jadi beng ke' topek ne bo'an alim di labo'. Ilu koma batu oban ne nyelibo batu dalem topek. Ame' pat tai ke' alo Serengau meno' alut ala' alim. Un dau senganak le Sekapan, "ikem ala' tua' ne alim, nta ame' oba' oman." Jadi ba'an tai le ala' e...ala' tua' ne baro! dau re. Mesem ale' pe teka' palai ngan kado wat!!!!MUAT ale' alim ji! Un sik alim je' ke gaban ji, ca alim mesem ale' oban ji. Ilu mesti tambah gola' boka le ke oman ji. Metut jipen e' oman dua liap re. Midan dian bo'an, sik alim bo'an ne ja. Ngan meka pe bua' dalau bai de'ca uko' ba'an nakan, kelemepo', bua' lepotan, bua' bokang, bua' kip, bua' leset, olep, ngan boka tiga la'a, mung bua' bo'an pabe' bua' beleti' te ngan bua' kawin. Barey dau isu le ne ngan mo'a tua' nilu ti ngan bua'. Kado' ale' bua' le ke Long Dungan. Bua' la'a buwau lepo' ilu. Un pabe' dian ngan mali. Kado' pe bua' beleti' de' nyeloman nai mudip oban lepo' ilu tai mola nya-in,..oban palai nyelo' luang bua' beleti',,tai re lepin, beng pelemebep ne dau tai luwang di labo',,penco mudip. Un dau du bekading de, senteng dau de' lata lepo' ilu nyelo' luwang alim! lan ji ta-in? Boka-e' na'at sik penekepe, nta ne satan. Bio' ale' sik luwang alim! kecuali batuk kelonan di senteng ida momat uko' ba'an tuduk penganen de. He he he he...jane dau palai bada' milu. Senteng nyelu' luwang alim me' di baro...ja dau re ngereta' ilu. Ten ngimet lah...Senteng tain? senteng tain? senteng tain? luwang dian lepa ma'an ke nyelo'!!!

PASEN BELAGA

Pasen Belaga jane pasen je' atek te' daya songai Rejang. Pasen ji ne je' menyaksikan se' gaya' lepo' ilu Badeng nai ponan peniga ji ngan du. Pasen Belaga bekading re, ca pasen je dumit tua' le ngan pasen ji beng mudip mempam tua' le. Tai taup, lenga ne se' osey pasen ji. Jam nem tai taup de' kado' ne kedai de' pekep. Un dua re tokey je' atek tisen lepo' ilu ka'i. Je' atek ilu tisen jane, Suyu. Nai abe' Long Musang te oban Suyu ji bekading re. Un dau bekading re ba'an dau de' lata',..Temagu, Temigau, di ne dau ngadan Kayan de' jadi juragan atau ulu alut nai ngkin kina' pedageng juan inu ke' Long Musang. Ida nai ngkin Suyu ngan Ampan Atong. Nai le buwau ke' Belaga, tenup ketai le juan kojau ke' osey Suyu ne ke' Belaga. Nta lepe un makit dalau ja. Ake' nawai lepe teka' tai juan kojau ke' osey suyu re bekading re. Ngajat tua' ne sik lepo' ilu ke osey ka. Suyu pe makin untung oban lepo' ilu beng meli galen tenup ke' ia tua' le. Mencam isu Kenya pe tokey ji. Ji ne sik kina' mencam nai pedageng pabe' re mencam isu anun le. Naki ake' pekalai isu kina',..ma'an teka' ke ti isu ji. un te po'o, keno keno ke,...ake' lepa tisen kado dau re,.kina Hokkien dau re kidi. Pabe' naki, jawai kenai lepo' ilu lepe de' cen Apau Data, Asap ngan Long Dungan ke' pasen Belaga nai juan inu. Un dau re bada' nta majan la'a du ke oyan ca Hospital ke' Belaga. Harap hospital ji tenoyan ngan sangkit. Naki kira tiga keriut oban un janan cen Belaga abe' Bintulu. Senteng nai nyeli'en ke Bintulu ngan lepa ja senteng pe ule' la'a. Bekading re,..beng kira ke todo nilu boka le ke nai ke' Kapit. Long Dungan kira tiga lote dari segi kedudukan, un te po'o, ba'i je ilu ke oyan oma nta-un. Ji ne sua' lepo' le pokey tai ke' apau Data. Nak pe meka, jawai kenai le meno' pasen Belaga lepe. Now mey ca,..eeii iit! Maju Belaga. Ja dau ca senganak le Sekapan Piit ke pasen Belaga. Tebelum ale' laki bio' i Belaga ke maju. Ja ne tebelum le. Ya lote keno keno sik kenai pasen ji bio' lote. Naki lepa senteng nilu taan kereta ke pasen ji. Bekading re,..beng beseka le sik ilu ta'an. Na'at sik gaban kedua ja un ca kereta 4wd. Ja ne kereta je' ame' nai tuung cen Bintulu abe' Belaga. Un sik amin je' temorek kerat ja, jane ne makit mading. Ka ne kenai lepo' ilu naki juan kojau ngan baa. Un pe lepo' de' ca, kayan, kajang, melayu de' juan ke makit ka. Ja tua' dau le liwai ji,...petego' la'a.

LONG DUNGAN

Long Dungan jane ca lepo' Kenyah Badeng lepa re pokey cen Long Busang. Ake' nai pokey ke Long Dungan kira-kira dalau oman e' 2 oman. I'ut ale' lepek dalau ja. Lepa ja amai me' ngkin ame' tai ngan du de' ading nai buwau ngetu ke Long Seguwa'. Ka'i ne tading osa ji nai bio' ngan tisen. Ake' paget nawai tai ke tu-un, lepa ja, nyekapu da batu pedat le ke' ka ngan nekibuk man taket te'. Nai bio' keriut, ake' paget nawai tai petu-un cen ca ulu ngap ke bela-u ke tu un me. ke long Seguwa'. Bela-u ji ida koma bela-u Pagang. Mpau ale' teka' ulu ngap ji dalau ja. Naki ake' tai ka,..liba' ale' le oban ne. Lepa ja ame' nai pokey ke Long Dungan.

Nai kado' ne lepo ilu nai pokey cen Long Busang, ngan lepo' ilu meli tana' cen Sekapan, ke' mpau liyang Sekapan. Oyan oma' ne du ke' mapau liyang di. Dalau ja, jawai mening sik alo baliu lepe. Poto tai mesi ke tuun ke' sada baie Long Dungan.Un gaban je' ke' sada mpau ka jane gaban oma' palai de' ke Long Dungan naki. Mudu ale' sik padang bub re oban dalau ja jane belua' oman.

Kado' pe ilu nak gaban ca liwai la o'o. Petego' la'a...