Data Kakus

Lepa majan ne tepat Badeng mudip ke' apau Data. Un kira kira lebih kurang 10 oman lebih tain?...ake' ngio' meka ne bane'. Jadi yu je' lepa tepat naat ke' Data naki? neng jo sik gayakl udip ngan sik tekejeng amin de' lepa tenedeng ke' Apau Data, sukup maju ne sik le Badeng keja. Tapi nak pe meka, un ca keperluan asas le je' nta lepe dengkep. jan ne JANAN.

Tading ke tai le pokey ka bekading re, lepat , masat taket ketai le ke' Apau DAta. Dalau ja re,...beng tekeli ne kise' wat batuk le ngan wat ujo' le pokat yang songai sanan ngan yang layun. hah!!!! lelat ale' teka' le ngimet janan ji. Lepa ja, tai maju kediut, un jana kompeni nai abe' ilu kapau,..ngan un tiga keiut. Jadi ilu pokey tai cen ulu Belaga,..nak yang gayung. Baya' kereta kompeni ilu keji. Un pe sik de' sokat oyan transprt milu dalau ja. Lepa ja un pe teka' ca awang e, ilu nai cun punan sama ke' abak bongan te. Ja pe un suyu oyan transport,,...moto injin lenyak...:)...lepa ja du oyan janan nai abe' Belaga,..jadi ja ne tepat nai ke Belaga. Ngan meka pe tai abe' Bintulu.

Jana je' ilu nak kaang ka sukup maan. Boka le ngimet,..lebih cen CAMEL TROPHY....nengayet tepat ngetiga jana ji....dadem tekona' le teka' le lepa le nak janan ji,.. naat sik gaban ji,..

2012

Tanggal 21, Bulan 12, oman 2012.
Ji sik ca tajuk cerita je' nta lepe nai luwa'. Nta lepe du boka' lepet cerita ji ke panggung wayang. Tapi naki ilu senteng naat kado' na'an sik cerita je' nai luwa' ke' internet. Terutama ke lepo' orang puti. Kumin ta'in, ke lan lote je' ida bada' ji?
Boka menurut dau de' mencam mida, ida lepa un pekalai ngan na'at sik tanggal ji, ji ne dau tau usun tana' ji ke tasa'. Un daure, dalau tanggal 21-12-2021 ji, o'o. usun tana' ji ngan meka' pe planet je' un ke galaksi le ke tai pekuwa' ajat ngan mata tau. Boka re na'at ji, un ca je' ke tenoyan ke usun tana' ji keja bana re. Je' atek petosa kimet le teka' jane, ida bada', mungkin usun tana ji ke pekaliu opa...boka naki usun tana' ji popa popa tai ke' kabing, lepa ja o'o usun tana' ji ke popa te' ta'u.
Jadi boka lan dau ji, basa' ke lempam bio' ne usun tana' ji boka meka! Daram le teka' le ngening ja. Basa' ji ne bana tuhan re, ke tasa' 2/3 usun tana' ji oban sogai bio'.
Nodep nemame
apan le nta tecu neng tau Tuhan nai kusun tana' ji ca liwai la'a.

YU LA"A TA'IN?

Beng ketai du makang makang ne sik ji! Boka le ngimet sik gaya' ida alo' saleng atau mepo de' ke tana' dipa te, beng makin buring ne gayak re. Boka le na'at yu toyan sik ji jane,...GILA KUASA @ LIGIT. Boka nta dua di, nta un je' cuk ida tai busik angan buring ale' pabe' re mita pemoyan de' atek dumit jadi bio'. Ilu naat perintah pe lepa dacing tai ekey. Ida de' ke nta obak ISA, du tangkep na' pe ida cuma lebi cen 4 osa. Tapi ida de' sokong ISA, nak pe ida kado',...polis cuk ida tai masat ngaang lasan. Yu ukuran atau standad ji tain?
Je' atek mading jane, ida de' tai ngkin ulu kerbau openg jidai tidaire ke' Selangor. Nta ne oban polis makang ke tangkep ngan miweng ida ke' dalem penjara. Tai masuk lokap pe boka kumin nuat ca tau . Tapi buat setakat ji, nta un yu yu tindakan. Pak tuwa' le bio sik benga, tapi ntaun de' ida ala'. Boka ji pemoyan je' bukan perintah,..majan ne ida di du tangkep,...ngkin ke sepin nta perlu bicara...ISA...Ji ne sik gaya de' lapa LAPA KELO' KE NYEMAAM ADET NGAN UN KUASA. Juko' lote katuk Tuhan bada' milu, kena usun tana' ji ke mo'o,...kado' perkara ke tenoyan,...gila kuasa ji ne ca ceng aang ja...

Majan ne oban ji...

Majan ne nta nai naat ngan oyan sorat kata le kejai ji. Kado naan teka' de' mempeng ngan ilu ti. Nta pe un toman-toman. Tai masat ka ngan ki,. Kado de' ilu ngening ngan un pe de' nta mencam teka' ilu ngimet.
Uko' baan je' mading neng jo adet atau pengelelaln le,...jane penggunaan ngadan "Allah". Ji pe ilu senteng oyan kata le ke pe pia. Yu je' atek penting neng jo ji?... Oban yu tain?....mateng mita toket? Kado' de' nat masuk akal!
Ngan je' mading la'a jane ida nai ngan du sebayang ke gereja,..oban re mita de' un tapung ulu nai sebayang " MURTAD" dau re kida. Oban yu re nai mita ida di?...basic human right " MUNG ILU UN HAK UNTUK MENGANUTI DAN MEMILIH AGAMA JE' ILU KELO' KE BAYAK". Termaktub dalam perlembagaan Malaysia...Nai pid amita de' nai masuk kriten ke gereja Katolik.
Nta ida ke ti la tain...ngan je' mading ale' jane ida tangkep ida de' YB ke' SELANGOR. Un je' cuk ilu tai ngimet te jane,...mung de' ida tangkep di jane senganak le KINA'. Oban yu ntaun ida Melayu? Oabn yu? Beng kina' di le de' ida koma un rasuah! Ida de' Melayu nta rasuah? Kumin kes de' kena kire? Ida dre' man daley kena ji? Kerajaan sebelum ji? Harta pelik@ nta tisen cen ngkey kemai di mung?
Moo tawai senganak. Ji ne sik gayak de' ilu koma Gila Kuasa!

Ramey O' O Ajau

Kumin sik ramey o'o ajau tepat liwai ji?
un lote tai tepat liko daduk ngan du? un lote tepat kancet lasan? un lote tai kediit leto didai datun julut? Un lote bu'in ilu oyan lekai?
Ramey o'o ajau sukup ramey sik milu Badeng bekading de. Lepa tai le oyan Kebana ji odai, tekep teka' le ke nyaliu ngadan ramey ja. Boka le beng koma dau tai KEBANA tepat? un isu KEBANA ji me lepu' ilu mu? ake' ngio' ji ca isu nao je' nai luwa' suwa' oban singkatan ngadan persatuan le. Mungkin tekep le ke ngaliu ngadan ramey le ji ke' Ramey O'O Ajau.
Oban KEBANA ji je' atek sin ne jane RAMEY O' O AJAU ji kanun le BADENG. Ilu tai nak ke' bolan nem oban le ke nego' anak sekolah cuti. Ngan senteng ke pekuwa' mung lepo Badeng ke Daley le nai noyen ramey ji. Ake' ngio' kain ne ilu petebulung de' lata' me lepo' ilu mung ngan pepo pekimet negn jo ngan toman udip le Badeng. Kai pe mung de' mencam ngimet ngan mpau sekolah milu nai pekatuk ngan nak semangat me anak mading le Badeng.
Jadi, tekep teka' le ke ngaliu ngadan ramey ji. Apan bekidai o'o, midn le tai denga, ilu senteng bada' isu le kenyah badeng me du de' ca,..
RAMEY O' O Ajau. Tekep ale' dau ja. Cen o'o le ke bada' e Gawai atau Keamatan.!!

NCR Land

NCR(Native Customary Right) land means land in which native cuatomary rights, whether communal or otherwise, have lawfully been created prior to the 1st day of january 1958and still subsist as such until today.
Jadi cun definasi je' telu lepa naat ki, tana' le ke' lepuun le jane tana' asal le, ilu un hak kidi. Tana' ji jadi tana' le ngan du de' ca ntan senteng ti man teka' pengoba' re ke oyan yu yu neng tana' ji. Tana' le ke' Long Musang jane tana asal le,..ji jane tana' NCR me Badeng. Ngan meka lote tana' Long Geng, ngan tana' le ke' Data Kakus. Mung di lepa jadi NCR land me lepo' ilu. Jadi boka un kompeni de' bada ida un lesen nai ala' kayu ki, ilu un hak mempeng ida ngan ngkin ida ke' joma makamah atau tai repot polis bada' ida menceroboh tana' le. Oban kado' kado' kompeni je' nai nasa' tana' le, nta re na' sorat tiga milu ngan nai mutu ngelelan kilu neng jo pampasan ngan persetujuan le neng jo ji. Tiga le klik ke tajuk NCR ji apan le senteng baca lebih kado' neng jo ji:
http://thebrokenshield.blogspot.com/2009/05/swak-govt-defeated-in-landmark-ncr.html

Selesema Babui

Ji sik mep de' un sio' penyakit selesema babui. Boka le naat sik gaban ji, jawai cuk sik sakit ji lepe cen daley le Malaysia @ Sarawak. Tapi naki lepa un ne de' sio' sakit selesema babui ji ke' daley Asia.

Sakit ji senteng nipo usun tana' ji dalem ca tau tuwa' le boka le nta pejaga' neng idi. Naki de' ke' padang kapen un lepa sukup jaga' ngan ida un tenup de' atek maju. Senteng pegaban ilu de' un sakit selesema babui. Jadi ayen pilu tai takut ale' ngan kedaru asu tai dalau bai kenta' mpa' bio' tai kelap sakit ji. Nta lepe un sakit ji ke' daley le.

Tapi tiga le pejaga teka' ngan petenup lote. Ayen pe tai toran ale'.

SWINE FLU

Ji ca berita je' bio' untuk masa ji!...Setakat beluwa' tau ji 28/4/2009, un lepa lebih 150 osa matai ke' Mexico. Sangkit ale' dau virus ji tai jangkit. Uko' baan ca mo'a atau pempey inat re sakit ji. Ida de' sio' e un pempey inat, sakit buku ngan mo'a dadem.

Ilu nodep nemame' apa penyakit ji un senteng ilu kawal ngan un ubat je' ke pedamo e'. Boka le naat sik keadaan ji naki, nuwat tuwa' le penyakit ji senteng nipo usun tana' oban naki du man kapen madang tai masat. Jadi mung de' nai cen tana' dipa,...un ne du cuk ida ngena nuwat apan re senteng naat sik pemoyan re,..sama ada ida di nta sakit, baru re senteng nai ke' daley le.

Mengikut dau re, virus ji jane gabungan virus sakit yap jidai ading re ngan virus kelonan ngan bu'in. Tai mencam ngan makin maan ne naban virus di naki. Mencam pekaliu suwa' obat de' ilu oman oban virus di...jadi, nebelum ilu pejaga' neng sakit selesema SWINE ji.

Ji ca definition me ilu mung:

"Swine influenza is a respiratory disease of pigs first isolated in swine in 1930, according to the Centers for Disease Control and Prevention. The illness is caused by four different type A influenza strains that can cause outbreaks in pigs, though subtypes H1N1 and H3N2 seem to be more common. The death rate among pigs is low, with most infections occurring in the late fall and winter.
Symptoms of infected pigs include fever, depression, coughing (barking), sneezing, difficulty breathing, red or inflamed eyes, lack of appetite and discharge from the nose or eyes."

LD bekading re ngan kumin naki?

Ji sik gaban Long Dungan dalem oman 2004 re. Kumin lote sik gaban Long Dungan naki odai? Majan ne' nta ala' gaban LD. Masa' kado' ne de' pekaliu bane',...tapi me mung de' pekaliu di, un ca tuwa' je maan ke pekaliu,...janan alun je' nai besut ke' LD. Un dau re bada' un janan ke nai besut ke,,,dau re....tapi ake' mutu ke' toyang e' nei ule' cen Belaga, ya bada',..majan ne janan jidai betep dau e. Ayen koma ke' Sekapan panjang, jana pe long Amo pe majan ne lepa betep. Ntaun peruntukan man re ke repair janan ja. Jambatan betep,..terut betep. Kumin lote ji to senganak? Yu ne oban suwa' le ngundi BN? Majan ne BN man Belaga nu....cen dalau nai me' buwau re BN menang. Jawai meka sik ketai le ke' pasen lepe. Ca' man alut. Majan ne du man sepeda. Jawai ketai le nyuun setinting le kalut lepe. Jwai le nta tiga lunto' ngimet alut ke' tuun lepe. Nta BN taan ilu tain? Nai pida oyan paip, nta pe oban re pekalai ngan tiga tiga,..nta sukup tekanan pe paip ja. Boka le ngimet, nta pesau le ulu paip le suwa' oban tekanan cen lalut, tapi maan ngena nai songai nyangan paip le. Beng pakai paip biyo' nilu, dau senganak le Sekapan. Senganak le Sekapan Panjang ne penyokong tegar BN, ca' sik re tai ngkin sung lote. Kumin tain??????? Negayet mita kelengkapan asas me ilu de' mudip nyeng kalo' ne. Ten nyat injin loten mini hidro me ilu Sekapan ngan LD. Ten tai mutu ke' wakil le boka le senteng ke oyan mpeng loten me tepat. Boka Bakun lepa o'o, ya tetap malep tepat ke' LD lote. Nta un bang kerajaan nai ngkin loten ka. Ilu tetap du lapa uko' baan sik ketai seperes ke Kapit lapa ilu. Ida nai nak loten me Belaga, tapi maan ale' kos re ke na' milu ke' LD. Kecuali boka papangan terbang ca' un ke' daya sekapan kidai. Mungkin kerajaan ke ngimet keriut ilu ka. Jadi, boka senteng, ten teka' tai cerita ngan senganak le Sekapan, ngkin ida pekuwa' tawai nyat mini hidro. Nengayet bada' mida ilu kelo' ke ketau ngau. Sewa kediut nta yu. Ilu kelo' ke ti pati ais, oyan segelem ngan senteng pedemun si yap majan kediut. Ngan senteng pedemun atok dalem pati ais. Mini hidro nta maan ale'. Ji ca keperluan asas le. Bada' sekolah pe un untung boka le un mini hidro. Sekolah Airport un elektrik 24 jam, tiga me anak ngan guru de' un ke' sekolah. Senteng gona komputer apan anak le nta tai tapa ale'.

Udo'

Ji se' ca contoh kalung le Kenyah. Udo' ji du ngalung ngan tiga lan si'. basa' un lepe tepat de' mencam ngalung bane'? Un lote teka' e ten ke ngalung, tapi nta un toman sik ketai lepa kalung e' ja. Uko' sik ca mpun julut de' ilu miwet sik tai kalung ake' oyan.

Tebelum le ilu de' naki ne ten teka' pekalai uyan udo' ngan tiga ngan ayen pe tai lopau kalung le. Boka du naat sik kalung le, du un tisen ilu ca kenyah ngan ca lepo' orang ulu. Boka du te' Indonesia, ida koma ilu ca Dayak Kenyah. Ji ca tradisi uyan udo' ngan ngelebu je' ilu perlu preserve me Kenyah. Un si' pintu gerbang senganak le ke Oma' Badeng Asap oyan atek tiga sik ja. Terana' sik oma' Badeng kane. Meka lote teka' le nebelum ilu de' ca ke oyan apan le tisen ilu kenyah kaang du.

Betik @ Tattoo

Betik atau Tattoo dau isu alo' lepa tai buwey ne sik ji cen lepo' ilu kenyah. Boka le tai nipo sik ilu ke' Data ngan Long Geng, Asap Koyan ngan meka pe Long BUsang, basa' nta ne tepat ta'an sik je' atek sin atau original tattoo@betik le Kenyah. Boka le na'at sik betik Kenyah, kado' de' ilu perlu ikut. Metik nta sebarang metik boka le baya' adet le Kenyah. Koda' boleng ilu kelo' ke metik ngan yu sik bonga' betik le, mung di un sen. Ja boka le kelo' ke na'at ji mung. Tapi kai ake' nta kelo' ke bada' ngan ngetisen mung di. Je' ake' kelo' ke bada' jane, betik atau tradisi metik ji lepa tai mo'o cen ilu Kenyah Badeng. Boka le naat, Badeng Boleng Kua Jata', mungkin ji merujuk pala' boleng betik ke' osa atau ujo' ngan taket je' un neng ilu Badeng. Un mengikit adet bekading de, boka le cen keturunan je' maren ilu un lema boleng betik taket. Boka korang, un telu boleng taket. Ngan meka pe seleng ngan ke liip le. Un pe betik de' un kalung lencau ngan bonga-bonga,..beng kalung udu' tuwa' le.
Ake' un mita sik betik lepo' ilu, tapi mengikut research, mung di ilu lepa un tai paliu ngan na' dalem bentuk de' ca,..jane neng kayu, belanyat, bak, ngan kado' senganan le Badeng. Nta nilu oyan di ke' osa le la'a. Basa' pilu koma di nta ca tradisi le,..je' atek lane, betik memang ca tradisi le Kenyah. Un betik uko' sik senganak le Kayan atau sekapan ngan lanan le Kenyah. Ayen pe koma beng Impan tuwa' le un betik. Tiga ale' sik betik le Kenyah oban le pute' ngan un anit buwe'. Tai lote' mita sik betik le Kenyah la o'o ake' na' milu naat ki. Nengayet teka' pudip taradisi betik me lepo' ilu.

New Cabinet Line Up

PM mading tepat lepa bada' barisan de' ke man tebuku le ke' daley le Malaysia. Boka le na'at sik mung kelunan de' ida mile' di, mencam lote sik re. Kado' pe de' ilu nta tisen oban yu re nta nak palai kidi. Boka le naat sik de' ida ala' cen s'wak, un lote sik re. Tapi ilu masih tertanya-tanya oban kuota je' ida nak ka un nta si' e sukup tebangan. Boka le ngio', basa ke tiga re ala' cen mung parti komponen BN de' bio'. Uko' baan sik sumbangan BN s'wak ngan S'bah, ida patut nak keutamaan me negeri di. Tapi dalem meka' ida nta senteng lepo neng negeri ngan senganak le de' ca uko' baan de' kado' milu ke' daley Malaysia.
Ilu lepa baca senganak le MIC kelo' ke menat wakil re cen barisan kabinet ji. Kumin boka le s'wak menat wakil le oban re nta na' wakil Bidayuh atau ilu de' ca tain? Kado' ale' wakil cen s'wak, un kira kira 30 osa MP tapi koda' le ke' kabinet? Oban yu re nta mile DPM cen parti de' ca uko' baan GERAKAN, MIC, MCA atau PBB? Oban yu re mesti ala' cen UMNO? meka' ne dau le tepa tepa ke mutu de' meki di.
Tapi neng mpau mung di, ilu harapkan kabinet ji sukat ngemaju ilu mudip ke' Malaysia ji. Ngan sokat menentukan seadilnya sik gaya' udip le. Ayen pe beng ke mile' neng ca lepo' tuwa' le.
Tiga pilu kuwa' naat sik labinet mading le de' senorat kentak kine:

Prime Minister and Finance Minister 1 - Datuk Seri Najib Tun RazakDeputy Prime MinisterMuhyiddin YassinMinisters in the Prime Minister's DepartmentDr Koh Tsu Koon - Unity Affairs and Performance ManagementNazri Abdul Aziz - Minister in charge of law and ParliamentNor Mohamed Yaakop - Economic Planning UnitMajor Gen Jamil Khir Baharom - Islamic AffairsDeputies: Liew Vui Keong, Senator Dr Mashitah Ibrahim, SK Devamany, Ahmad Maslan and Senator T MurugiahFinance MinistryNajib Abdul Razak (1)Ahmad Husni Hanadzlan (2)Deputies: Chor Chee Heong, Senator Dr Awang Adek HussienEducation MinistryMuhyiddin YassinDeputy: Wee Ka Siong, Puad ZarkashiTransport MinistryOng Tee KeatDeputies: Abdul Rahim Bakri, Robert Lau Hoi ChewAgricultural Development and CommoditiesBernard DompokDeputy: Hamzah ZainuddinHome AffairsHishammuddin HussienDeputies: Abu Seman Yusop, Jelaing MersatInformation, Communication, Arts and CultureRais YatimDeputies: Joseph Salang Gandum, Senator Heng Seai KieEnergy, Green Technology and WaterPeter Chin Fah KuiDeputy: Noriah KasnonRural Development and TerritoriesShafie ApdalDeputies: Hassan Malek, Joseph Entulu BelaunHigher EducationKhaled NordinDeputies: Dr Hou Kok Chung, Saifuddin AbdullahInternational Trade and IndustryMustapa MohamadDeputies: Mukhriz Mahathir, Jacob Dungau SaganScience, Technology and InnovationDr Maximus OngkiliDeputy: Fadillah YusofTourismNg Yen YenDeputy: Sulaiman Abdul Rahman Abdul TaibAgricultureNoh OmarDeputies: Johari Baharom, Rohani Abdul KarimDefenceAhmad Zahid HamidiDeputy: Abdul Latif AhmadWorksShaziman Abu MansorDeputies: Yong Khoon SengHealthLiow Tiong LaiDeputy: Rosnah Rashid ShilinYouth and SportsAhmad Shabery CheekDeputies: Razali Ibrahim, Wee Jeck SengHuman ResourceDr S SubramaniamDeputy: Maznah MazlanDomestic Trade and Consumer AffairsIsmail Sabri YaakobDeputy: Tan Lian HoeHousing and Local GovernmentKong Cho HaDeputy: Lajim UkinWomen, Family and Society DevelopmentSenator Sharizat Abdul JalilDeputy: Senator Chew Mei FunForeignAnifah AmanDeputies: Senator A Kohilan Pillay, Senator Lee Chee LeongFederal TerritoriesRaja Nong Chik Raja Zainal AbidinDeputy: M Saravanan

Kediit leto/ anak dumit

Anak leto dumit ji atek manteng ngan bio' ngan menging ale' dau toyau pak leto dumit ji. Boka le tai masat ke' pasen ngan ke' supermarket, sa'e teka' le dakep ia oban ne bikak ngan menging ale'. Mung du naat ilu oban re koma ilu tai ala' anak du de' ca. Na' pe mkea, timai sik osa re, ngan sukup senteng cuk ilu miyat teka' re. Na' pe meka, pejaga' tiga le tepat neng anak dumit de' nta tisen yu yu di. Ya re koma udip ji ca ramey lemoto ngan nta tisen de' tiga ngan jaat. Beng tiga mung ne du de' se lao kida bana re.

Un kaine tidaire, kelonan ke' kuching ne daram oban un dau du nai ngelau anak dumit ngan nyat de' to'a bayan ligit. Kelonan jaat di sukup mencam, ida pakai telepon awam man re telipon oma' le ngan bada' ida lepa ala' anak le ngan nyat ilu bayan ligit. Ayen pe beka' daram boka em terima panggilan meki. Ngelelan anak em un ngan lepa ja tiga pe bada' me polis. Apan polis senteng ala' tindakan tai tangkep kelonan de' ale' pedaram du di.

Pejaga' tiga le tepat ayen cuk anak le luwa' malai ke' du de' ilu nta tisen, Ayen cuk anak le tai tengen meli inu walaupun nyeng le kata tai re. Nta le tisen tepauk nai nantak ilu.

Takau Cen Keraan Besi

Tau kelema re ilu lepa naat si' ca peristiwa je' sukup bio' me ilu ke M'sia. Tau kelema re jane perlantikan PM m'sia je' ke-6. Nta majan lepa ja ya boka dau PM mading ji bada' denga tiga milu ne. Ia lepa cuk du nakau ida de' sio' sepin oman je' lapa re oban perinta tangkep ida sio' akta dena' dalem daley, ISA. Ida di penco du nyepin, ngan nta re senteng nyat tai ke' makamah apan re pekarak ida.
Boka le naat yu si' PM le je' lapa re, ia beng koma iya nta un yu komen oban mung ida perintah tangkep tenecuk ku'un Kementerian dalem negeri. Naki ilu naat ida di du nakau tanpa kado' isu. Oban yu PM le je' lepa re nta senteng nakau ida di? Un le ke pejaat PM le je' baru resign tidaire? Kado' persoalan je' nai.
PM le mading ji nakau palai mida, ngan un lepe de' ida nta nakau. Oban yu re nta nakau ida mung? Iya bada' apan le senteng menikmati kebebasan ke' M'sia. Ngan un pe la'a surat khabar alternatif je' ida cuk du tangkep ngan nta senteng keluar la'a tidaire lepa ida bada' senteng. Nta lepe perintah bada' suwa' yu surat khabar ji nta senteng di published!
Boka le naat ngan tiga sik kronology je' tenoyan ji, mung di lepa ida rancang ngan tiga ngan lepa un dalem kimet re, ke ti pemoyan di, apan rakyat sokong ida. Kena ki re, nta pe kumin, kumin, ya re tangkep du ne. Lepa ja, kena du ke pilihan raya, nta senteng keluar newspaper, daure. Lepa laki ji jadi PM, senteng dau e. Boka le naat, ji, lepa ia oyan mung di, oban kado' ale' du nta nyokong ia. Kado' ale' du mia ke' ia.
Arep ia oyan mung di ngan tiga tawai. Oban ilu pe nta senteng ti teka' ngan kimet le tengen bada' ia nta ngan kimet tiga. Basa' lan ale' pe ya nta tisen yu yu ngan keputusan ji ya senteng oyan ngan PM le kena ki re nta senteng oyan keputusan ji. Ilu na'at kumin sik lepa ji la o'o. Arep nta re ti perkara je' pelik pelik je' cuk ilu rasa uko' baan pesalau anak dumit man segelem re penteng tangey re.
Lemoto nemame' me ida de' man ilu apan le sentiasa senteng mejo adet le ngan nta un de' senteng mempeng ilu neng jo adet le.

April Fool?

April fool??????
Kado' ale' du de' oyan tau ji ( 1- April) man de tai nyekiat ngan petecu de' toyang. Un pe de' oyan tau ji man re penteng e'a re neng toyang atau ida de' ida miyat na'at. Jadi midan ida di tai siuk tepap re, ida bada',...APRIL FOOL!!!!!!!!!!!!!!! Nta ne toyang atau ida de' ida nyekiat di senteng mia oban ida bada' tiwi jane masa le palo du! Midan awang te oban Tuhan le bada' milu, ilu kelonan senteng palo mung du tuwi. Nta nilu ti sala' keji. Nta le tisen un senorat ke' KITAB INJIL le. Jadi pala' ilu mung de' ngelan Tuhan, ayen le tai palo du tuwi. Palo tetap palo ngan suwa' palo tetap kuwa'. Nta kira tau yu atau tanggal koda' le palo du.
Un ca link je' ake' naki jane bada' un komputer virus je' nai menjangkiti server ke' tipo usun tana' ji tauwi. Nta ji april fool. Meka dau expert bada' boka le naat berpandukan artikel ji. Tiga pe lawat laman web ji. Jadi nak pe du bada' meka dau, ilu tetap pejaga' ilu semae' apan apan le nta tai sio tepap du milu. Un pe palai nekai pabe' re ti trekai je' atek cuk tai du lema', ngan boka le mpau da'a, penco metan le keja to. Tiga le na'at petikan je' ake' ala' ji;
"Experts also advise keeping your security applications and operating systems updated."The most interesting thing about this worm is that every time someone finds out a way to get rid of the worm, it reinvents itself with more rigor and better technology," Schmidt said.Authorities have not identified the culprits behind the worm or their intentions. Microsoft has offered a $250,000 reward to bring the Conficker creator to justice." as written in http://www.baltimoresun.com/technology/bal-april-fools-worm-0331,0,1930609.story
Jadi, pejaga' tiga le neng virus ji.

NEW PM

Minggu ji mungkin ca minggu je' atek majan ngan dado' me ida de' ngena ke tai naik pangkat. Minggu ji ilu ngio' ke na'at ca pertukaran ke' pucuk pimpinan le Malaysia. Nta beng UMNO tuwa' le ji,...ji pemimpin me mung ilu ke' Malaysia ji.
Boka le naat sik yu je' lepa tenoyan, kado' ale' ilu de' tesenook ngan ilu nta tisen poon ngan ujung nge. Beng je' ilu tisen sik, ya meka sik kenai inu di luwa' ne. Kado' inu de' tenoyan secara co-incident. Dau le Badeng kidi jane,....tepauk,...Jadi nta le tisen balo' ji tepauk ke kuwa' nai tenoyan atau du nangen nepauk inu di tai tenoyan pekuwa'. Ilu na'at sik neng pilihan raya liwai ji la...mungkin un pe inu de' tenoyan necu. Boka le na'at sik du kempen, ida bada', ngam ngam un bajet ligit oman ji ngan inu ji jane ca inu je' ilu ke na' keutamaan. Ngkey oban le un ligit kena ji re tain dalau ekonomi le tiga. Dalau ekonomi le nta tiga, penco dau le un bajet!
Nai nyepulik ke je' ke nyaliu PM le, kumin teka' le ngimet laki ji? un tiga atau ja'at tain? Nta le tisen ngan dalem neng je laki ji. Tapi kado' ale' du de' nta setuju ia ke ala' alih tempat PM ji. Ilu ke' lasan Sarawak, tiga le ngimet neng jo osa le tengen. Ilu mesti oyan ca je' ke paliu sik gayak perinta le kaine. Kado' ale' sik tekaja' kaang ilu neng jo struktur pengudip ngan de' un gayeng tiga milu ke' sarawak ne. Badeng nengayet tepat!!!

Ponga' Uong

Punga' uong jane ca cen je' lemoto ilu tego' ke' oma ngan lasan pasen. Tiga ale' sik poyan cen ji. Mening saleng sik poyan ne. Beng masat ngau tuwa' le. Tapi ilu mesti tisen, sakit ale' teka' silu ponga' uong ji detem ke' ujo' le boka le ten ke ala' ida. Mudip dalem tana' cen ji. Jadi meki ne sik tebelum ponga uong ji nai ke' lasan tai mita toyang ngan mita pengoman mia. Walaupun nta senteng madang cu'. ya ketai ponga' uong ji nengayet lote. Arep tepat senteng oyan gaya ponga uong ji jadi teladan. Nengayet walaupun ilu tisen maan ale' ngan saten. Udip ponga uong ji nta majan ke awang ne. Majan dalem tana'. Meka lote udip le kelonan ne. Nta le majan mudip ke' usun tana ji. Basa majan dalem tana udip le. Pe lera langit ja nilu ke tisen tuk udip le. Na' pe keno keno, ilu tetap tai maju ngan maju dalem udip le. Ayet le mubut. Naki keadaan politik ngan ekonomi nta un tiga, jadi jaga jaga nilu. Kado' penecu je' ilu ke nyeripa neng oman mading ji. Jaga' Jaga'.

Pepo Petebulung

Dalau sik du tai punan peniga ji, ngan dalem keadaan ekonomi je' atek maan ale' sik ji, tiga ne tepat pepo petebulung nyeripa diam ji. Naki ilu na'at, kado' ne de' maan maan sik. Kena PM le ke resign, kado' ne de' tenoyan. Ilu nta tisen ji merupakan ca tanda ilu menuju kenta' atau ketai negara le maju? Petenup ne tepat Badeng!

ERA MADING ME NEGARA MALAYSIA

Bulan ji jane bolan je' ketelu dalem oman 2009 ji. Un ke ujung bolan ji o'o, ilu ke menyaksikan ca pertukaran ke' pemimpin je' atek mpau dalem pentadbiran le ke' negara Malaysia. PM atau Perdana Menteri le mungkin ke pesaliu dalem bolan ji o-o. Ilu beng ngena ngan na'at yu je' ke tenoyan. Boka le na'at yu sik sejarah atau denga denga je' ilu ngening, laki je' ke jadi PM le ji o'o kado' ale' denga e' Ilu nta tisen ja lan atau nta? Boka le na'at ading re lepa Tun Dr. Mahathir memberi laluan me Pak lah, Ilu na'at ji ca je' atek tiga ale'. Pak lah ten ke ngkin ca perubahan dalem pentadbiran negara ngan transparansi dalem pentadbiran. Tapi mung di ilu na'at lepa ngkin ca perubahan je' cuk ia tengen terpaksa melepaskan jawatan lebih awal cen o'o je' ia ngio'. Ilu nta tisen yu je' tenoyan atek lan ne' .
Ilu arap laki je' ke nyaliu ya ji o'o un tiga ngan senteng membuktikan bahawa ya nta uko' ba'an yu de' du bada' ke' berita atau internet. Ja ne dau tebelum le me laki ji. Ilu nebelum ia ngkin peniga ngan ngkin awang kata le ke ngelaset ngan tiga ka'ang ilu.
Boka le na'at je' atek cuk ilu nta mencam teka' ngimet jane sik pemoyan ida de' ke' Perak bulan ji. Tidaire, senganak le je' ke jadi PM ji tai ngkin ida angkat sumpah ke Perak. Lepa ja un kucar kacir,....ya penco ngeliyep beb! oba' tepat na'at ji tain? Tiga pe na'at yu sik ya senteng ke ti me Negara le.

Valentine's Day

Tuwi jane tau me mung de' lepa pepeto ngan de' dalu re pekancau tai ngeramei tau re. Kado' ale' sik du tai meli kempang ke' pasen tuwi. Ngan kado' pe de' juwan kempang ke' sada janan. Necu sik juwan kempang ne palai. Na' pe meka, kado' ale' pe de' tai meli kempang last minute dau alo' kidi. Ngan dalau meka, rega kempang di ma'an ale'. Boka kelayan re juwan ca ligit setengah ca kempang, tuwi, ida juwan rm10.00 ca kempang. Pengeliba' sik rega ida nak jane rm5.00 ca. Kado' ale' untung re. De' un kebun bonga ne untung tuwi.
kumin sik le Badeng petakau anak, ngan boka kumin dik, ida de' un gaban sintek milu, nengayet teka' cuk de' mencam milu oyan sik cerita ji la'a ngan nyintek nak ke CD atau DVD apan le senteng peremun disc ja o'o man le na'at sik adet Badeng bekading re.
Ngan un pe ca je' ake' nawai la'a jane tai moyat!!!! Ramey ale' teka' tai moyat du. Kado' anak dumit de' nangey dalau le moyat ida. Ngan un pe sik oyat de' cuk ilu gera' pe sakit batek tekeli!!!Basa' nta ne anak de' naki ne tisen "moyat" ji odai. Je' ida tisen jane, Santa Clause tuwa' le. Ji ne sik oyat mading le naki. Mung du tisen Santa Clause ngan anak dumit sae' ale' oban Santa Clause na' gola' batu atau keropok mida. Un dau anak laki e', " Nta e' oba' Santa Clause, ya nak gula' batu tua' le dau e. Ake' oba' pokok krismas!! oban un hadiah kenta' pokok krismas! Jane dau anak le tepa ngimet. Tapi memang lan, ilu nak hadiah kenta pokok krismas, ngan mpam krismas(25-Dec), ida taga na'at un kotak hadiah ngan ilu petolat mida. Ja ne sik anak le naki ne tisen.
Jadi ake' ten la'a mita yu je' atek lepo' ilu Badeng ngeramey dalau du ngeramey Valentine's Day ta'in? ten ten teka' mita,...mungkin un de' ilu lopau,.

Mabun Lemoto Sik Awang

Ngajan ee beng ojan ne teka'. Cen mempam abe' tai taup. Un dalau du taun baru kina', un pekena keriut teka' ojan dalau ja. Lepa ja,..nai pe ojan kasa nta mencam nteng jidai la'a. Tidaire ake' tai ke' Sibu, jawai sik re lempam lepe. Ngan un pe toyang e' cen Bintulu bada', Sebauh lempam. Pabe' tak can no.2 mpau sik re lempam. Tai mita yu pokat kayu dau e bada;' make'. Ake' nawai ke' Long Dungan bekading re, dalau lempam, kado' ale' yu nai pejakak ke' kayu. Ngan lepa lempam kado' anak atok ke songai Dungan utun.
Tuwi ole, ake' ngening berita, kado' pe du de' perlu tai pokey oban oma' re lempan. Nta sik ojan ji ke pekena'. Jawai sik ji kemeki lepe la'a. Meka dau de' na'at awang langit milu. Kado' ale' lepe sik abun kempau tana' le Sarawak. Ida ke' Miri pe un lempam ngan abe' janan alun pe un kelebak!. Un dua re oto labo' ke' dalem kelebak ja. Un tega oban re nta nyarem sakit.
Jadi ake' kelo' ke ole' ke' Bintulu nya'ap re,..nta jadi ngkin kereta oban re bada' basa janan un lempam. Beng bas le senteng tai pelebau lempam ja...Terpaksa ngena la'a. Bekedai pe taile ke' Bintulu la o'o. Kuching un ne lepo' de' lempan. Ida de' oyan amin re ke' tana' leba'.
Arap awang nai dema ngan ta'an mata tau ngajan ee o'o. Kado sapai ngan tabang le de' nta muwang keji. Peno' apai. Boka le pakai loten bekading re,..ilu meladang ke' loten ne sapai le pe muwang!!!

OMAN MADING 2009

Selamat Oman Mading 2009. Tebelum le ilu mung un magat muat neng oman mading ji. Kado' ale' ne de' ilu lepa ti neng oman je' lapa re. Jadi oman ji, boka nta lepe lepa teka' yu de' ilu kelo' keti, metuk ti ja oman ji. Boka oman ca re ilu rasa nta sukup, oman ji ti je' lebih tiga la'a. Bekading re, ma'an ale' teka' ngimet oman ji,..kena ji ke tai tahun 2010 ne. Kena tahun 2000 ading re,...kado' ale' dau du bada' milu. Kumin boka tai oman 2010 ji la o'o tain? Basa' pe kado' ale' de' ilu ke ngening la'a. Beng ca tua' le je' ake' oba' ke ngening,...udip selawan ke' usun tana' ji. Terutama ke' a'ang lepo' Israel ngan Palestin. Midan le ngening udip dena' ka'ang, ida,..ja bada' milu,..kena udip le ke' usun tana' ji ke ko'o neja.
Poto lan pe ketai US presiden ten ke oyan keti kaang ida,..nta pe lepa lepa. Balo' oban re ke meka ne ja. Nta le tisen midan re ke mudip dena'. Ngan ke' Malaysia na'ki pe ilu lepa na'at kado' ne de' paliu. Ngan nta nilu tisen e'e de' pisu lan mida. Un pe de' tai sumpah ke' masjid, ngan un pe palai nta oba' tai sumpah. Un pe de' bada' mung di politik. Kumin teka' le ngimet ja?...Nta majan la'a un pilihan raya ( UNDI) nilu ke' daley Sarawak ji. Ji ne masa le mili' de' ke pisu milu ke' kerajaan negeri. Jadi oman ji jane ca omanje' atek penting milu kenyah. Nengayet mecuk c amilu apan le un pak ke' kerajaan negeri. Ya pilu lepa oyan persatuan KEBANA,..jadi tebelum le la'a jane ilu senteng petebulung mecuk ca wakil le ke' kerajaan negeri. Boka le na'at sik gaya' le ke daley Belaga ngan Baram,..ake' ngio' lebih un tebelum le ke' daley Belaga. Ilu kira kira 50:50 ngan senganak le Kayan. Ngkey tele oban ca ke tai milu. Beng senganak le Kayan ne sik ke man ilu. Ake' ngio' mencam ale' pe lepo' ilu. Nengayet senganak....nengayet mecuk ca me tepat...Nta kira cun parti yu....ayen beng na'at BN ne. Ake' rasa naki nilu mita wakil...nta parti je' ilu na'at. Yu gona BN boka nta un yu kemajuan ya nak milu? ja dau le na' keriut kimet milu...boka le nta setuju,..nta pilu senteng kumin keja...tapi na'at tiga tiga....kumin sik du ale' peniga cen oban talu le...ngimet tiga tiga,...Kado' senganak le impan naki lepa ntaun tana oban sua' re nta tisen du nekalu ida...ngimet tiga tiga...yu ilu ala' milu boka du de' ca ala' lebih bio' untung cen tana' le...